ليه مش نازلة يوم 25؟؟! اللى داخلين يشوفوا النوت دى , اما عايزين يعرفوا ليه البنت اللى فلقتهم بكلام عن البلد و السياسة و عاملة روحها فونطة عالينا و ماعيشة فى دور الثوار جاية تقول دلوقتى مش نازلة, أو يشوفوا ازاى واحدة كانت من الثوار اقتنعت بالمبدأ الكنبى و قررت تبقى من أهل الكنبة فجأه!!
بس الحقيقة لا دى و لا دى, الحقيقة ان انا حاولت افكر ايه الاسباب اللى ممكن تمنعنى من النزول اليوم ده , و اذا كان فى 100 سبب يخلينى انزل اكيد فى كام سبب يخلينى منزلش,و ده اللى وصلتله:
1- انا مش نازلة عشان اسلوب الوحشية فى التعامل مع المتظاهرين متكررش بعد الثورة و أكبر دليل فض اعتصام 9 مارس بالورود و البونبونى ,,
2- انا مش نازلة عشان ال 20 مليون اللى كنا هنصرفها فى الخازوق اللى عليه علم مصر, المشير قرر انه يخصصها لعلاج الحالات الحرجة فى الخارج.
3- انا مش نازلة عشان نظام الشفافية اللى الحكومة متبعاه, و دلوقتى بقينا عارفين كل عضو من المجلس العسكرى و كل وزير بياخد كام , حد كان يطول!!
4- انا مش نازلة عشان اخيرا بقى فى حد اقصى للأجور, مبقاش فى مرتبات بال100 الف, و مرتبات ب200 جنيه!!
5- انا مش نازلة عشان حرية الرأى اللى المجلس مديهالنا, يعنى مايكل نبيل مثلا بالرغم من انه بيقول كلام يعادى المجلس, مشاء الله عاليه زى الفل قاعد فى البيت اهه ,و اكبر دليل قانون اباحة الاعتصامات و المظاهرات!!
6- انا مش نازلة عشان القضاء نضف, مبقاش فى تلكع فى المحاكمات و حتى الضباط اللى متهمين فى قتل الشهدا, محبوسين و بيتعاملوا زى االمساجين الطبيعية,, و المدنيين بيتحاكموا مدنيا و طبيعى جدا العساكر بيتحاكموا عسكريا, اكيد مش العكس مثلا!!
7- انا مش نازلة عشان قانون الطوارئ اتلغى , ماا هو برضه مش منطقى بعد ما الثورة تقوم عشان تلغيه , المجلس يبقى عليه يعنى!!
8- انا مش نازلة عشان بالرغم من حزنى على الاف اللى ماتوا فى 25 يتاير, الا ان الحمد لله مافيش شهدا تانى وقعوا! مينا دانيال بيكل قلقاس فى البيت عشان غطاس بقى انتوا عارفين ,, علاء عبد الهادى جاب امتياز فى اخر امتحان ليه, محمد مصطفى بيستعد لبطولة التنس اللى جاية!!
9- انا مش نازلة عشان المجلس عمل زى ماحنا عايزين بالظبط دستور الاول و بعد كده الانتخابات على نور بقى
10- انا مش نازلة عشان المجلس فعلا حمى البلاد! اول ما الناس ابتدوا يهدوا فى كنيسة اطفيح, الجيش تدخل و الحمد لله الكنيسة مش محتاجة ترميم عشان الجيش حماها من اللى بيهدوها! و بالرغم من الفراغ الامنى اللى حصل الا ان قوات الشرطة رجعت و معاها قوات الشرطة العسكرية قدروا يحموا البلاد و بالزات خط الغاز اللى انفجر 15 مرة بس!!
11- انا مش نازلة عشان المجلس صدق فى كل وعد وعده, و أكبر دليل انتخابات الرئاسة اللى تمت فى شهر 9 اللى فات و بقى عندنا رئيس جديد و اتسلمت السلطة لسلطة مدنية بعد 60 سنة من حكم العسكر !!
للأسف ملاقيتش ولا سبب يخلينى منزلش!, حاولت كتير بس معرفتش!, صدقونى نفسى ييجى اليوم اللى نقول فيه الموضوع مش مستدعى اننا ننزل, كان نفسى نظرية المؤامرة او الطرف التالت تبقى صح, كنا هنساعد الجيش و نقبض عليه,, محدش غاوى يحتج , و مش داخلين موسوعة جينيس فى عدد الشهداء و المصابين! و عيون الحرية مش اعضاء زيادة فى اجسامنا!! نفسنا نوصل للسنة اللى نقول فيها "انا مش نازل يوم 25"
No comments:
Post a Comment