عسر هضم: الذكورة "جيبة و بنطلون"

كل فترة بتنتشر صورة لأحد عروض الازياء للملابس الرجالي فيها عارضين أزياء لابسين جيبة (جونلة) او فستان , و انتشارها غرضه الأساسي هو التحسر على صورة الذكور اللي اتدهورت , و كذلك صور ذكور لابسين بنطلونات ضيقة او اي شيء غريب .عن اللبس السائد حاليا

و لأن الموضوع مستفز لأنه متعلق بالتعصب للشكل الحالي للذكر (او الأنثى) و مقابلة اي شكل مختلف بهجوم محتواه الوحيد هو التقليل من ذكورية الذكر المختلف او أنوثة الأنثى المختلفة

.ممكن نرجع لورا شوية عشان نشوف الدنيا كانت ماشية ازاي

الأكيد ان كل الناس عارفة ان الحياكة (الخياطة) كانت اختراع , في بدايته كان بدائي جدا عبارة عن شرائط من ورق شجر تُقطع عشان يتجمع بيها ورق شجر أكبر شوية , بعديها ابتدت الحياكة عن طريق شرائط الجلد ثم اختراع النسج (صنع النسيج) , و لحد بعد اختراع النسيج , الشكل في اي حضارة مكانش يختلف كتير عن الحضارة التانية , بعيدا طبعا عن النقوشات و الزخرفة و هو ده التميز الحقيقي ,و السيلويت هو الشكل الخارجي لأي شيء, silhouette مع اختلاف بسيط في شكل الملبس

و الشكل كان بيتراوح بين التونيك "جلباب قصير" او جيبة قصيرة (زي المصريين القدماء و الحثيين و الآشوريين و الفرس و غيرهم)

و احيانا التونيك بيُلبس عليه وشاح كبير عبارة عن قطعة قماش كبيرة بتلف بأكثر من طريقة حسب المنطقة (زي الاغريق و الرومان و الفينيقيين)

بس الأوشحة او اي جلباب طويل ماكانش بيتلبس وقت الحرب و فالأغلب كان بيلبس الجيبة القصيرة , و ده كان لبس الحرب و معروف عن المحاربين هم اكثر فئة جريئة و بالطبع في مجتماعاتنا العربية و الشرقية الجرأة صفة بنسميها "رجولة" و إذا كنت بتشوف جيش اي بلد حاليا هم "أرجل" ناس فالبلد , ف ده كان لبس أرجل ناس فالبلد وقتها.

نرجع بقى لبداية ظهور البنطلون (البنطال), ربما صنع الإنسان ما قبل التاريخ البنطلون و ربما لأ , لكن بداية الحضارات كان يغلب على صورها صورة الجيبة القصيرة او التونيك ,و لأن "الرجالة لازم تلبس كدة" مش سبب كافي لإختراع شيء فالبنطلونات ظهرت لسبب او ضرورة

في مقالتين كتبهم اتكلمه فيهم عن ظهور البنطلون في التاريخ و اسباسبه Peter Turchin حسب كلام العالم الروسي بيتر تورشين

, رجع سببه للحرب ,حسب مقاله , اول ناس ارتدوا البنطلون هم البربر , البربر اللي احنا بنستخدمهم للتعبير عن اي مجموعة من الناس بتعمل تصرفات غوغائية , بس الحقيقة هم اول ناس فكروا في شكل البنطلون عشان يقدروا يحاربوا و يرفعوا كفاءة الفرسان لأن ركوب الخيل و هم لابسين جيبة او تونيك كان شيء صعب و أثر على معاركهم , و ده السبب اللي خلى اليابان تتبنى لبس البنطلون للفرسان رغم ان ردائهم الاصلي هو الكيمونو للجنسين"

و كذلك الهند تبنت البنطلون لرفع كفاءة الفرسان

الحكاية الأبرز اثناء المقالتين هي حكاية الصين , خلال من القرن الخامس إلى الثالث قبل الميلاد , و ده الوقت اللي وصل فيه البربر للحدود السهلية للصين

(steppe frontier سهل جغرافي بيمتد بين اوروبا و دول آسيا من ضمنهم الصين)

و بدا البربر فالاستغناء عن المشاة و استخدام الفرسان , و ده حفز ملك الصين وقتها انه يقوي سلاح الفرسان في الصين , لكنهم كانوا لسة بيلبسوا الرداء التقليدي فالحروب , ف طلب منهم يرتدوا رداء البربر (البنطلون) لكنهم رفضوا , و مالاقاش حل غير انه يبدأ يلبسه هو لعل و عسى يشجعهم , و بعد اما استشار مستشاره إذا كان يقوم بخطوة صعبة زي دي و هي تغيير رداء المحاربين و يلبس لبس البربر و مستشاره أيده في قراره , بالفعل بدأ بلبسه في المحكمة و طبعا هوجم بهجوم شنيع من المجتمع و محاولته لإقناع الناس بتغيير ردائهم فشلت , بعدها بفترة ولايات الصين بدأت تتبنى البنطلون فعلا بالتدريج و من خلال المجتمع مش عن طريق قرار من حاكم .

و هلم جرى , تخللت فكرة لبس البنطلون في معظم شعوب العالم , و في المقال برضه يحكى عن اوروبا بعد سقوط الامبراطورية الرومانية, حكم اوروبا مجموعة من المحاربين حاربوا من خلال ركوب الخيل , فبالتالي ارتبطت فكرة ارتداء البنطلون بالطبقة العليا و الحاكمة عكس باقي عامة الشعب.

و ده السبب الرئيسي لإرتباط البنطلون بالذكور فقط , رغم استثناء وحيد و هم محاربات الأمازون , و بالتالي تطورت فكرة ارتداء البنطلون عند الذكور قبل تطورها عند الإناث , حتى وصولنا للشكل الحالي و هو استغراب اي ذكر يرتدي جيبة او تونيك قصير واعتباره بيتشبه بالإناث .

بالرغم من تعصب الناس ضد ارتداء كل ما هو "مفتوح من تحت" للذكور , المجتمعات الشرقية لسة بتتبنى ارتداء الجلباب بشكل قوي و ماحدش بينظر له نظرة مختلفة على إنه شبيه بالفستان او حتى بالجلباب النسائي .

أما عن استخدام القَصات في اي شكل ملبس , فغرضها الاساسي هو تشكيل الملبس ليلائم مرتديه سواء ذكر او انثى , هو شيء يخدم الإنسان , مش يميزه عن الآخر .

من الآخر , حقك ترفض لبس اي شيء شايفه غريب , و حقك تنتقد شكله, من حيث الشكل الجمالي او وظيفته , أما ربط كل شيء بمدى تأثيرها على "ذكورة" او "أنوثة" الشخص هو شيء تافه , لأن التاريخ بيثبت ان كل شيء بيمر في عجلة لا تمل من الدوران , و إذا كنت تظن ان من يرتدون الجيبة (الجونلة) من الرجال ليسوا "رجال" بالمعنى الذكوري البحت فهذا خطأ , اعنف فئة في التاريخ و هم المحاربون بالفعل ارتدوه , ربما بعد كام سنة او حتى كام قرن , يُعاد ارتداء الجيبة القصيرة او التونيك للرجال و ساعتها سيتم النظر إلى البنطلون أنه شيء غير مريح ينتقص من ذكورة الشخص , ربما! و ربما لأ .

.آخر ملاحظة , اول تبني لإرتداء البنطلون في ايطاليا كان البنطبون الضيق "سكينني" , و سببه برضه هو ركوب الخيل للمحاربين

صور :