اشياء خاطئة تعلمتها عن الآخر في مدارس الأحد

تنويه : اكتب هذا الكلام مع علمي أن هذا نتاج طبيعي لما نعيش فيه من مجتمعات مغلقة, و برغم الاشياء الخاطئة والمفاهيم الغيد دقيقة التي وصلت إلينا ,ربما أجد أن ذلك التدهور ليس بالسيء جدا ,ربما سيء فقط , أكتبه لا لأي غرض إلا محاولة معرفة الآخر وتعريف الآخر لما يحدث في المجتمعات البعيدة عنه أملا أن يأتي يوم يستطيع ابناؤنا أن ينموا في بيئة سوية أكثر مما تربينا فيها.
و مدارس الأحد هومصطلح يطلق على الفصول التعليمية فالكنيسة خاصة للصف الإبتدائي , وتستمر في جميع الفصول لكن تطلق عليها اجتماعات , يتم التعليم فيه عن الدين والدنيا .

 1

"لا مكان آمن خارج اسوار الكنيسة"

في ابتدائي, بعد درس طرد المسيح للباعة الجائلين من الهيكل

الخادمة (أي المدرسة): يسوع طردهم عشان كانوا بيبيعوا حاجات فالهيكل زي الكنيسة كدة

 طب ليه عندنا كانتين فالكنيسة؟ - 

لأ , ده احنا مضطرين , عشان ما تطلعوش تشتروا من المحل اللي برة و يحصل لكوا حاجة -

2

"حب صاحبك المسلم بس ماتصاحبهوش أوي"

في ابتدائي, حصة الدين فالمدرسة

اصحابنا المسلمين طبعا نحبهم, بس يعني مش لازم تبقى دي اقرب صاحبة ليكي ,مش عشان هم وحشين, يعني الاصحاب القريبين"

" بيعملوا كل حاجة مع بعض , هاتعرفي تصلي مع صاحبتك المسلمة ؟ او تقوليلها ياللا نروح الكنيسة؟ كدة هي مش هاتبنيكي روحيا.

والحقيقة ان ده مكانش خطاب متطرف من نوعه , او عالاقل على مستوى ما صادفت من خادمات ومدرسات وانا صغيرة , والخوف طبعا لا يسيبوا الرخصة عالبحري  لمصادقة المسلمات\المسلمين عادي كدة من غير لا ضابط ولا رابط , فالطفل يبطل يروح الكنيسة ولا حاجة ,كأن الكنيسة هو المكان الوحيد المسموح بممارسة النشاطات من خلاله.

فاكرة حديثي مع صديقتي فالكلية و احنا بنتكلم عن الأسر المسيحية فالجامعات ,كانت بتحكي عن صاحبتها المسيحية فالمدرسة " حاولت أقنعها كذا مرة تخرج معانا و تفتحها كدة شوية ,مكانتش بترضى"

3

"ربنا عايش في بيت ربنا ومابيروحش حتة برة"

في الصف الأعدادي 

  يعني مانروحش السينما؟ السينما حرام!-

لأ طبعا احنا معندناش حرام , مفيش حاجة اسمها حرام ,بس يعني قبل ماتكون هاتعمل حاجة ,فكر المسيح ممكن يعملها معاك ولا لأ-

وأي مكان رايحه , فكر تقدر تاخد المسيح ولالأ, يعني تنفع تاخد المسيح معاك السينما 

و ده كان قبل ما أكبر و أعرف ان المسيح بيروح السينما عادي يعني ,و حتى الآن مالاقيتش مبرر ليه المسيح بيتفرج عالتليفزيون وبيكره السينما .

"السينما من العالم والعالم وضع فالشرير"

4 

"ولاد العالم و ولاد ربنا"

ولاد العالم دايما مضحوك عليهم و مابيفكروش من اعتى شرير زي هتل لأبن العالم اللي قاعد جنبك فالميكروباص ,

ولاد العالم ماينفعش يتجمعوا مع ولاد ربنا و ولاد ربنا ماينفعش يعملوا اي حاجة ولاد العالم بيعملوها

 الرقص و" الغنا والمزيكا و التمثيل"(خارج إطار التسبيح و تمجيد ربنا) بتوع ولاد العالم مش بتوع ولاد ربنا

ولاد ربنا مابيعملوش جرائم , لو قلت لحد ان فيه واحد قتل مراته طبيعي يعني , لوذيلت الجملة بإنه مسيحي , يبقى هنا لنا وقفة , و استغراب و أكيد أكيد مايعرفش ربنا و عمره ما راح الكنيسة و مسيحي بالأسم فقط . 

5

البنات و الولاد و علاقات جنسية كاملة " على رأي طلعت زكريا"

منتصف المراهقة

و حيث ان الكنائيس بتتبع نظرية الفصل بين الجنسين منذ بداية المراهقة حتى في الانشطة الخارجة عن مدارس الأحد ,فبالتالي كل     جنس من الجنسين هو إناء فارغ مُغري لبث كل ما هوغير صحيح عن الجنس الآخر

و التعليمات التالية هي بالأساس للتعامل مع الذكر من ولاد ربنا ,الذكور التانية مش موضع سؤال

" لما تتكلمي مع زميلك وانتوا واقفين فالحوش مثلا, يبقى بينكم مسافة ,حوالي ذراع مثلا"

والمبهر في الأمر هو رجوع العمل بمقياس الذراع و القدم , و مسافة الذراع لم يتم تحديد لماذا ذراع واحد بالتحديد ,لذلك أترك الاجابة

. لخيال القارئ

 "مفيش هزار مع زميلك بالأيد"

وحتى الآن ممكن نتوقع حسن النية من الجملة هو الحفاظ على المساحة الشخصية للفرد بالرغم من انها نصيحة توجه عامة بعيدا عن نوع اللي هايهزر بالأيد ذكر او أنثى

وهنا نيجي لإجابة سؤال 

"ليه مفيش هزار بالأيد؟"

"لأن البنت بتستثار باللمس ,ف ماينفعش زميلك يهزر معاكي بالأيد"

طيب.

" يعني الولد اللي عايزنمرة موبايلك عايزها ليه؟ ,لو عايزك في حاجة عادية هايكلمك على تليفون البيت, لكن البنت مش تقفل عليها باب اوضتها و تقعد تكلم في ولاد"

قعدت فترة مش قليلة من سنوات مراهقتي معتبرة نمرة التليفون شيء مقدس وجزأ لا يتجزأ من احترام البنت لنفسها , نمرة التليفون مش اي حد ياخدها وحد معناها ذكر ,و اللي بيطلبها عايز يكلمني بتاع ايه يعني ,و ده سببه الرئيسي ان كل تعاملاتي وقتها كانت مع إناث 

.فقط , مدرسة بنات بس وكنيسة بنات بس ,وبالتالي الولد اللي يطلب ياخد نمرة البنت يبقى ليه غرض تاني.

6

مع الأسف يابا ,الدنيا دي غابة مالناش مكان فيها" من تتر مسلسل حضرة المتهم أبي"

كل الدنيا بتضطهدك , عِش ضحية تعيش مرتاح 

القصص تروح و تيجي و دافعها الاول و الاساسي انك لوحدك يا ولداه ,و لأن المسيح قال طوبى لكم إذا طردوكم و عايروكم , فأنت مش هاتتبارك من ربنا غير و أنت مضطهد, حسيت بالاضطهاد؟ لسة؟ لازم تحس .

7

" المسلمين akaرجوعا إلى الصداقات مع غير المسيحيين"

الصف الثالث الثانوي , قبل دخول الجامعات

"طبعا مش هاقولك تصاحبي المسيحيين بس , عشان ممكن تبقى انتي المسيحية الوحيدة فالدفعة , بس يعني خلي بالك فالتعامل , على قد" الدراسة و الكلية و خروجات بسيطة , يعني ماتروحيش للبنت البيت يعني , ادينا بنسمع حاجات غريبة , فيه بنت لسة قريب راحت عند صاحبتها قامت صاحبتها خطفتها و جوزتها لأخوها , بياخدوا فلوس عشان كدة"

دي النصايح"المفيدة" قبل الكلية , و هي إن صاحبتك اللي مش زيك فالدين ممكن تعزمك عالغدا عندها فالبيت عشان تجوزك لأخوها,و , ده لمجرد النصح بحسن نية , مش عشان تمشي متخيلة ان كل الناس عايزاكي تغيري دينك لا سمح الله.,

و ده بعيدا عن ان خطاب "ماتروحيش بيت صاحبتك اللي عندها أخ" ده خطاب مجتمعي مصري صميم و فيه أسر كتير بتتبناه ,حتى .

المسيحية فيما بينها  

و لما سألنا عن مصادقة المسلمين من الذكور 

"على قد هاي و سلام و الكلية و بس"

8

"مابنقولش كل حاجة قدام الناس"

و قررت ترك النقطة دي للآخر لعل و عسى اللي هايقرر يبعتلي كلام توبيخي عن ليه انا باتكلم كلام سبلي عن المجتمعات المسيحية يقراها فأصعب عليه و يوفر علي و عليه المناهدة .

المجتمع المسيحي جزء من المجتمع و جزء يتخلله فساد زيه زيه اي مجتمع مغلق تاني و لازم نفتح الشبابيك عشان الكمكمة تروح , عشان ولادنا يجوا في يوم من الأيام يشكرونا اننا علمناهم صح ,عشان محدش كمان عشرين سنة يكتب نفس الكلام بالظبط