دليلك العملي لأختيار فستان الأشبينات (ال برايدز ميدز في قول الفرنجة )

في محاولة للنقد الموضوعي لأغلب الفساتين المستخدمة في ظاهرة اشبينة العروسة أو البرايدز-ميد, و مساهمة في نشر الوعي  الخاص بالقَصات و الأقمشة الأفضل ,مع إيماني الكامل بحق كل واحد في اختيار اللي يناسب ذوقه , و رغبة مني في تقليل الإحتقان بين العروسة و اشبيناتها بسبب الفساتين اللي بيضطروا يلبسوها , دي بعض النصايح اللي ممكن تفيد: 

, حددي ميزانية الفستان قبل ما تختاري التصميم , و انزلي اتعرفي على اسعار الأقمشة في السوق , شوفي الرديء و الجيد و المتوسط 

 .اعرفي هاتمشي في أي إتجاه (يفضل يكون مع حد على دراية بأسعار القماش أو يعرف يفاصل كويس) كمان اسعار التفصيل و انسب
 سعر بالنسبة للجودة , اتأكدي من شغل اللي هاتتعاملي معاه. 

لو الميزانية قليلة , مش مهم ولا مشكلة , المشكلة إنك تطمحي بتصميم تنفيذه عشان يطلع بجودة عالية يحتاج وقت و حرفية و مجهود ,و

 ساعتها عشان يتعمل يتكلفة أقل , يا إما هايطلع بجودة قليلة أو خامات رديئة

و لأن الميزانية العالية بتسهل كل شيء , هانتكلم عن الميزانية القليلة من حيث كل حاجة : 

اولا التصميم: إبعدي عن التفاصيل الكتيرة في التصميم, بلاش درابيه و كشكشة و فصوص أو قَصات كتير تحتاج مجهود ف بالتالي
 التكلفة تبقى عالية , التصميم البسيط تنفيذه أسهل بجودة أعلى . 

ابعدي كمان عن الفساتين ال "كاب" او ال سترابليس (بدون حمالات) لأنها رغم انها بتبان حلوة في الصور اللي بتلاقيها عالإنترنت بتحتاج كتير من الدعامات عشان تبقى ثابتة طول المناسبة و في الآخر الفرح مش مجرد صورة, و محدش يحب يفضل يشد في فستانه طول اليوم, ممكن حتى تحققي الشكل اللي محتاجاه من الفستان السترابلس عن طريق انك تكمليه ب قماش تول لون الجسم او اي لون تاني عشان يسهل الحركة و يبقى شكله حلو 

. 

ثانياً: القماش: اول حاجة تهربي منها الستان العادي, لو فيه عدو حقيقي ليكي في الفرح ده ف هو قماش الستان العادي, لمعته قوية و مش دايما ده شيء كويس , مابيبقاش فيه مطاطية و دي مشكلة مع الفساتين الضيقة , و اخيرا بيبان فيه كل عيوب التفصيل و ابسط غلطة بتنور فيه , اقصى شيء ممكن تستخدميه فيها هي تبطين الفساتين, و شخصيا لا افضل الستان التركي برضه 

ده فستان غالي جدا لمصمم مشهور (زاك بوزن)و أكيد الستان بتاعه غير الستان بتاعنا, بس برضه فشل, حاولي تختاري القماش ده بعناية و تشوفي لمعته في ضوء قوي 

الستان فيه منه أنواع تانية زي ال "درا ستان" و دي خامة تقيلة و لمعتها مطفية و مش بتحتاج بطانة في أغلب الوقت, و أختيار ذكي كتير بيبعدوا عنه ماعرفش ليه. 

"الستان الإيطالي أو الألتا مودا " فيه كذا نوع منه كلهم تحت نفس الأسم , لمعته لطيفة برضه (مش دايما! خلي بالك) بس أخف وزنا من الدرا

 ستان و أفضل من الستان العادي بالتأكيد 

الشيفون ستان اختيار ظريف , لمعته ظريفة و انسداليته عالية جدا و بيبقى حلو في الفساتين اللي فيها درابيه.  

حاولي في المطلق تختاري أقمشة فيها شوية مطاطية و لا يفضل "الجيرسيه" عشان مش كل الناس تعرف تشتغل بيه , القماش اللي فيه ليكرا بيسهل كتير في تظبيط الفستان خصوصا لو فستان تصميمه ضيق , بيسهل كمان في الفساتين اللي فيها درابيها. 

حاولي تختاري تصميمات ما تستهلكش قماش كتير, خلي تمن القماش في الكم مش الكيف, يعني الفستاين المنفوشة بتحتاج تول كتير مش طبقتين فقط,

الدانتيل و الجبير اللي بتشوفيه في الفساتير على الإنترنت في الأغلب تكلفتها عالية جدا , الاستغناء عنه بيبقى ساعات كتير أفضل من

.استبداله بقماش أرخص ,هايحصل زي كدهوه 

. 

نرجع للفساتين في المطلق سواء غالية او تكلفتها قليلة:, إذا كانت الإشبينات أحجامهم مختلفة حاولي تختاري تصميم يناسبهم كلهم , و اتأكدي إن كلهم مرتاح لشكل الفستان, شوية مراعاة, أو الأفضل إنك تتركي الحرية لكل واحدة تختار تصميم يناسبها مع الإتفاق على لون أو خامة موحدة, بلاش الفساتين القصيرة بزيادة خصوصا إن الإشبينات كثيرات الحركة في الفرح و مش لططيف إن كل شوية تقف تشد فستانها لتحت, إتأكدي كويس جدا إن الفستان متبطن كويس و مفيهوش شفافية غير مرغوب فيها.

اللون : تقريبا أول حاجة بتلقطها العين في الفستان , حاولي تختاري لون ما يعذبش اللي شايفه, ليه ألوان فاقعة؟ مفيش أي مبرر, خصوصا إنه مش فستان واحد! دول كتير , حاولي كمان تختاري لون حديث و البنت تقدر تلبسه في مناسبات تانية من غير ما يبان إنه فستان أشبينة ( كلنا عارفين بس مابنقولش على فكرة).

الفستان و الكاميرا لازم يكونوا أصدقاء , خلينا نكون واقعيين , كل ده بيتعمل عشان الصور في الآخر, ايه الفايدة من فستان حلو في الحقيقة لو بيطلع وحش في الصور؟ الخطأ الشائع في الفساتين الشيفون , إنها بتتبطن بلون أفتح من لون الشيفون و عادة بيكون ستان و بيلمع و طبعا الترزي هايقولك" احنا نعمل الستان على وشه عشان الشيفون هايطفيه كده كده و اللمعة مش هاتبان" كداب! اللمعة بتبان في الكاميرات , يفضل استخدام الستان على ضهره في أي وقت, بالذات تحت الشيفون. 

أخيرا, الأسعار: اسعار القماش متفاوته جدا , نتكلم في الطبيعي, اسعار الستان اللي "مش عادي" بتتراوح بين 50 ل 80 مثلا, فيه أكتر طبعا , مالناش دعوة بيه,  

اسعار الدانتيل اللي بيستخدم في السواريه ممكن تبدأ من 50 او ج60 , و تصل ل فوق ال 300ج فيه أكتر بكتير طبعا, و كل ما كان أغلى كل ما كانت تفاصيله اظرف و القماش مليان مش فاضي 

اسعار الأقمشة المُطرزة تبدأ من 150 ج مثلا و ده قليل الوجود و تصل لحد الألف و ما فوق ,. 

أسعار الشيفون بتتراوح بين 20 و  30 ج, مفيش أغلى غير لو حرير طبيعي 

أسعار التفصيل متباينة جدا , فيه ترزية بيبدأوا من 200 و 300 جنيه للفستان و تصل ل 500 , ده بالنسبة للفساتين الطبيعية مش خطوبة أو فرح , شخصيا شايفة ان 500 ده آخر رقم منطقي, بعد كدة إما التصميم صعب جدا أو فيه شغل يدوي إما الشخص ده حرامي  ( طبعا الأسعار خاصة بالترزية مش بالمصممين اللي بيعملوا تصميماتهم, دي حساباتها مختلفة).

ده تقريبا كل اللي أقدر أقوله عن فساتين الأشابين , أغلب الكلام يُطبق على كل الفساتين, و دمتم