"هى الناس دى بتاكل أيه؟! .. بيبي"
الجملة الشهيرة من فيلم "اللي بالى بالك" و الحاجة الوحيدة تقريبا اللى طلعنا بيها من أفلام محمد سعد و بالرغم من أن الجملة كانت فى سياق مختلف تماما إلا أن الجملة للأسف تنطبق على حياتنا اليومية!
البيبيى اللى هو مخلفات الأنسان ممكن كمان يبقى أفكار بما يسمى ب"الخراء الفكري" بس احنا هانقول عليه بيبي عشان وقعها أخف شويه .)
ازاى تاكل "البيبي"؟!
مش معنى أنك مختلف عنى أنى بسهولة اقول عليك بتاكل بيبي و دى حقيقه , يعنى انت ممكن تبقى متبنى تفكير عكس تفكيرى, عادى,, لكن ده لما يبقى تفكير أصلا!
يعنى لما تعمى عينك عن حقيقه شايفها بنفسك عشان تفضل محافظ على صورة حد و حاجة فى خيالك يبقى بتاكل بيبي!
لما تشوف "فيديو" لبنت بتتسحل من رجال جيش و تقول أصل واحد لابس "كوتشي" فأكيد دى لعبه علينا عشان الجيش حمى الثورة ,, يبقى حضرتك بتاكل بيبي!
لما بسهولة تقول ليه البنات يروحوا مظاهرات زحمه و أكيد فيها تحرش يبقى هما عايزين كده يبقي حضرتك بتاكل بيبي!
لما تلوم اللى اتفقعت عينه عشان كان واقف فى أول صف يبقى انت لسه بتاكل من نفس البيبي!
لما تتوقع أن الميدان هو ميدان حرب مش مجرد صينية في قلب العاصمه يعنى مافيهاش قوات أحتلال بتحاربنا و لا حاجة يعنى فالطبيعى ان اللى ينزل يموت هناك يبقى بتاكل بيبي!
لما الناس يصعب عليها رئيس يتنحى عن منصبه و مايفرقش معاها ناس تتنحى عن حياتها كلها يبقى بتاكل بيبي كتير بقى !
و لو قررنا نسرد كل الوقائع اللى بنشوف ناس فيها بتاكل بيبي مش هانخلص لأن ببساطه كل يوم بنكتشف أنواع اكتر من البيبي و للأسف بنكتشف ناس أكتر بتاكله من حولينا!
ليه الناس بتاكل البيبي؟!!
لو فكرنا كده فى أسباب ده هنلاقى أنه مش سببه انه ناس بتفكر بطريقه مختلفه عنّا لكن المشكله أنها ناس مش بتفكر أصلا, ليه؟! لأن ببساطه أنت لو بتشوف و بتقيم الأكل اللي قدامك أكيد هاتعرف أنه بيبي قبل ما تاكله!!و لا أيه؟! لكن لو شفته و قيمته و عرفته و بعدين أكلته يبقى عديت مرحلة أكل البيبي.D
كتير من الناس للأسف بتاكل البيبي لأنها مابتلاقيش غيره تاكله , بمعنى أن لو حصلت حاجة و انت مش بتتابع أى قناة محايدة (إلا حد ما) و لا بتشوف أخبار و لا بتشوف الكلام اللي بيتقال علي شبكة الانترنت و حد قابلك فى ميكروباص و حكالك ممكن تصدقه بسهولة لأنك ملقيتش مصدر غيره تعرف منه! أكلت البيبي منه لأنك ملاقيتش غيره ! و ده طبعا غلط منك لا شك يعنى!
هتلاقي ناس كمان بتاكله لأنها ماتعرفش أنه بيبي, يعنى لو انت فى مناخ مثقف مستنير بيتابع الأحداث كويس و بيقيمها من عدة أبعاد هتلاقي نفسك بتفكر فى الكلام اللى أنت بتسمعه , كويس؟! منطقى و لا لأ؟! لكن لو فى مناخ بيعتمد فى كل حديثه على "بيقولك" أو " انا سمعت من جوز بنت خالة اللى جابوا أمى" هتلاقي انه بيردد نفس الكلام من غير مايفكر فيه , بياكل البيبي على مشمه و عادة أى كلام قبليه "بيقولوا" بيبقي بيبي مش عارفه ليه؟!
فيه ناس بقى بتختار أنها تاكله و كل مرة ترجع تاكله تانى و مابتتعلمش و ده متهيألى راجع لأنه شايف ان كل اللى حواليه بياكلوا بيبي و لأن الأختلاف بيكلف الناس تفكير و فعل مضاد أو معارض للى بيحصل فهو بيختار ياكل من اللى الناس بتاكله,, عشان ببساطه مايبقاش هو المختلف!
المشكلة ان الموضوع بيتوسع و بينتشر و بتوصل لأن الناس بتاكل أكتر من نوع من البيبي و دى مش حاجة هزار أو عشان نضحك بس الظاهره بَقت واضحه و بتدل على أننا قدامنا كتير عشان أولا نقنع الناس انها بتاكل بيبي و بعدين نقدملهم بديل عنه , لأن ببساطه اللى مش هايلاقى أكل نضيف ياكله هايرجع تانى ياكل بيبي !
متهيألى ان مجرد ما نقدر نقدم شيء مختلف للمجتمع و نستمر فى
تقديمه لحد ما الناس تنسي طعم البيبي أيه , المشكلة ممكن تتحل و لحد ما المشكله تتحل يفضل السؤال قائم "لماذا تأكلون البيبي؟"
No comments:
Post a Comment